Un ano máis a nosa comunidade participará na Romaxe de Crentes Galegos. Trinta e nove anos sen faltar a esta cita na que nos rebautizamos como galegos e o habemos ir exercendo. O lema deste ano é «Romeiros do Alén» e será dentro, da nosa provincia, na localidade de Cerdedo no lugar denominado Monte Xeixo-Portalén.
“Hai un monte en Galicia onde as pedras falan e o vento chora. É un lugar onde conviven os mouros, as bestas, menhires e santuarios sagrados. Un monte mítico, un santuario celta, onde ían e aínda van os veciños de Cerdedo a falar cos seus mortos” (Xurxo Salgado)
Queremos abrir portas a outro mundo posible, ese mundo do que tanto levamos falado nas nosas romaxes: o mundo do pan compartido e repartido, o Mundo onde ninguén sexa nin se sinta descartado, ese Mundo que o Nazareno deu en chamar “Reinado de Deus”. Velaí a porta que nós queremos atravesar: do mundo da exclusión ao mundo da inclusión.