Encontro con Gustavo Gutiérrez (2)

Seguimos compartindo convosco as impresións do encontro con Gustavo. Esta vez son pinceladas sobre as actitudes dun/dunha boa transmisor/a do evanxeo tomadas do mesmo evanxeo como é costume en Gustavo:

1/ Entusiasmado/a con Xesús e a súa forma de vida: dous discípulos do Bautista vanse con Xesús. Onde vives? Vide e verédelo! Fóronse con El, gustoulles e quedaron porque tiña sentido para eles “mellorar a vida humana”? Probamos a vida de Xesús e entusiasmámonos con ela?

2/ Deixarse querer polos pobres, ser os seus amigos: unha muller en Betania derrama sobre Xesús en agradecemento un caro perfume ante as críticas dos comensais. Xesús déixase querer. A solidariedade ten ida pero tamén volta que hai que saber acoller. É importante a xustiza, pero non hai que esquecer a gratuidade. Nas nosas comunidades os pobres son só obxecto de caridade ou son tamén os nosos amigos?

3/ Aprender a mirar: Xesús, sentado diante do peto-tesouro do templo sabe valorar a pequena esmola dunha pobre viúva e descubrir a arrogancia que hai detrás da esmola dun rico. Xesús sabe ver os signos das persoas e dos tempos; sabe discernir. A Igrexa, as comunidades, sabemos descubrir os signos dos tempos: a democracia, os dereitos humans, a igualdade da muller…?

4/ Aprender a cambiar. Foi o evanxeo que leimos fai dous domingos cando Xesús logo de moita insistencia dunha muller pagá de que curase á súa filla descubriu que estaba chamado a acompañar non só aos seus sino a todo aquel ou aquela que  necesitase  axuda. Xesús aprende a cambiar; ser humano é saber cambiar. A Igrexa, as comunidades, nós sabemos cambiar ante as circunstancias que nos toca vivir?

Vale por hoxe. O resumo é só un aperitivo para as comunidades que despois desexen profundar sobre él durante o curso neste ano que a Igrexa de Tui-Vigo proponse potenciar o estudo da Biblia.