O grupo Imán e o programa Sere@s do Casco Vello celebraron onte mércores o Día Internacional da Non Violencia e a Paz cun acto presentado por Antón Bouzas, coordinador do grupo, no Centro Cívico Casco Vello.
O encontro abriuse cunha breve charla de Luís Cendón, portavoz do Imán, sobre a campaña As navallas, perigosa compaña. Vigo capital mundial da movida de cidadáns sen navallas na rúa, realizada ao longo do 2007.
Ademais, o portavoz das persoas sen teito, Iván Vasconcellos, presentou a campaña deseñada para o 2008, dando lectura ao fragmento inicial do texto do xefe indio Seattle ao presidente de EEUU en 1855.
A continuación a escritora An Alfaya recitou dous poemas seus: o primeiro sobre a hipocresía coa que é usado o termo “solidariedade” na nosa sociedade, e o segundo sobre a prostitución.
Nese momento abriuse un coloquio entre os participantes no acto, que se pechou cunha interpretación musical con flauta travesera a cargo de Sabela González.
Ás 8:30 todas as persoas presentes no Centro Cívico desprazáronse portando veas acendidas á Praza da Constitución, onde se repetiron as intervencións musical e literaria, procedeuse á lectura dun breve comunicado no que se solicitou o fin da violencia e as guerras no mundo, e gardouse un minuto de silencio por todas as vítimas da violencia.