Estamos no tempo de Pascua e por tanto estamos a celebrar a alegría da presenza entre nós de Xesús Resucitado e para recibir a vida nova que el nos dá. Este fin de semana é especial na Pascua: celebramos a Pascua do Enfermo. Como todos os anos o Grupo de Pastoral da Saúde da nosa Parroquia convídanos a esta celebración pascual especial na que membros da nosa comunidade van recibir o sacramento da Unción, o sacramento co que Xesús Resucitado achégase a eles coa súa forza, para acompañalos, confortalos e enchelos de vida. Felices vós que ides recibir o sacramento da Unción, sinal de que Xesus Resucitado está ao voso lado comunicándovos o seu agarimo e a súa forza! Axudaravos a vivir con serenidade, con confianza, con paz, con amor e agarimo cara aos demais. E , unidos a El, seguiredes anunciando a todos que a vellez, a enfermidade e o sufrimento nunca poderán quitarnos a nosa esperanza.
A Celebración Comunitaria da Unción de Enfermos será hoxe sábado 20 de Maio na Eucaristía das 8 da tarde.
